Dzejas slams latgaliski “Rogovkys dzejis voga”

Sastdiņ, 13. septembrī, plkst. 19.00 Rogovkā nūtiks catūrtais dzejis slams latgaliski “Rogovkys dzejis voga”.

Sasaceņss: latgaliski rokstūši drūsmeigī dzejnīki.
Bolsuos: žureja i skateituoji.
Dzejis vogā ražu laseis: Lauris Zalāns.
Muzicēs: grupa “Sovvaļnīks”, Rēzeknis nūvoda vokaluo studeja “Skonai”, grupa “Tā kā pērn”.

Rogovkā īcarātais dzejis slams ir vīna nu septembrī tradicionalūs Dzejis dīnu laika nūtikšonu. Dzejis slams ir dzejis kusteiba, kas Latvejā i pasaulī (storptautyski zynoma kai “Poetry slam”) atdzeivynuojuse interesi par myusu dīnu dzeju. Tuos pamatā ir nūsaceita dzejnīku saceņseiba, kurys laikā autori skaita sovus dorbus skateituoju prīškā, bet žurejis i skateituoju bolsuojumā teik nūskaidruots ituos saceņseibys uzvarātuojs.

Eipašais nūtykums byus treis jaunu skaņdorbu pyrmatskaņuojumi, kurus ar pārnejuo gods uzvarātuoja Silvestra dzeju byus radejuse grupa “Sovvaļnīks” i Rēzeknis nūvoda vokaluo studeja “Skonai”.

Apvīneiba “TKP – tā kā pērn” etnomuziku Julgī Staltis i Ērika Zepa sinergejā dzyma Latvejas kusteibys “3×3” nūmetnēs ituo godu symta suokuos, izskonūt taišni reizi godā i „tā kā pērn”. Dzīsmis i stuosti caur laiku laikim nu vysys Latvejis, sasavyn jūs muzykā. Jei skaņ kai goda saulis rytums, kai dzeivis ceļš, kai Dīvu i goru sarunys. Jūs muzyka ir par lībīšu tautys i baltu ciļšu saplyusšonu caur dzīsmi, caur mīlesteibu, caur myusu zemi.

Iz nūtikšonu aicynoj Rēzeknis nūvoda Kulturys i turysma puorvaļde, Nautrānu apvīneibys puorvaļde i latgalīšu kulturys kusteiba “Volūda” ar Vaļsts kulturkapitala fonda atbolstu.